​រដ្ឋាភិបាល​វៀតណាម បានដាក់​ផែនការ​ក្នុងការ​ពង្រឹងសមត្ថភាព​វិស័យ​សុខាភិបាល​នៅក្នុង​ទីក្រុង​ហូជីមិញ​ឲ្យ​កាន់តែ​ល្អប្រសើរ សំបូរបែប និង​ទំនើប

​តាម​ប្រភពព័ត៌មាន​ដដែល មន្ត្រីជាន់ខ្ពស់​នៃ​រដ្ឋបាល​ក្រុង​ហូជីមិញ លោក Nguyễn Thành Phong បាន​ថ្លែង​ក្នុងជំនួប​ជាមួយនឹង​ក្រសួងសុខាភិបាល​ខ្លួន ថា លោក មាន​ជំនឿ​មុតមាំ​ថា គោលដៅ​នេះ ពិតជា​អាចទៅរួច បន្ទាប់ពី​ក្រុមគ្រូពេទ្យ​ក្នុង​ទីក្រុង​ដ៏​មាន​សក្តានុពល​របស់​វៀ​ត​ណា​ម​មួយ​នេះ បាន​ប្រតិបត្តិ​ការងារ​លើ​ករណី​ពិសេសៗ​ដោយ​ជោគជ័យ រាប់បញ្ចូល​ទាំង​លទ្ធភាព​ក្នុង​ការផលិត​វ៉ាក់សាំង Covid-19 នៅក្នុង​ស្រុក​ផងដែរ​។

​ទន្ទឹមនឹង​ការដាក់​គោលដៅ​នេះ រដ្ឋបាល​ក្រុង​ហូជីមិញ នឹង​ផ្តោត​សំខាន់​លើ​ការបណ្តុះបណ្តាល​ធនធាន​មនុស្ស អភិវឌ្ឍន៍​សេវា​សុខាភិបាល​សាធារណៈ និង​សុខាភិបាល​ឆ្លាត​វៃ ក៏ដូចជា​តំបន់ឧស្សាហកម្ម​ឱសថ​។ ការពង្រឹង​វិជ្ជាជីវៈ និង​គុណភាព និង​ការអភិវឌ្ឍ​បច្ចេកវិទ្យា​វេជ្ជសាស្ត្រ និង​បណ្តុះបណ្តាល​វេជ្ជបណ្ឌិត និង​គិលានុបដ្ឋាក ឲ្យ​មាន​ស្តង់ដារ​អន្តរជាតិ ក៏​ស្ថិតនៅក្នុង​ផែនការ​នេះដែរ​។​

​គួរ​ជម្រាប​ផងដែរ​ថា ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ ការអភិវឌ្ឍ​របស់​វៀ​ត​ណា​ម មាន​លក្ខណៈ​ហក់លោត និង​លេចធ្លោ​ជាងគេ​មួយ​នៅក្នុង​តំបន់​។ ប្រទេស​អាស៊ីអាគ្នេយ៍​មួយ​នេះ កំពុងតែ​ទាក់ទាញ​ក្រុមហ៊ុន​វិ​ន​យោគ​ធំ​របស់​ពិភពលោក​ជា​បន្តបន្ទាប់​៕